Exul ego clericus

Ad laborem natus

Tribulor multociens

Paupertati datus.

Literarum studiis

Vellem insudare,

Nisi quod inopia

Cogit me cessare.

Ille meus tenuis

Nimis est amictus,

Saepe frigus patior

Calore relictus.

Interesse laudibus

Non possum divinis,

Nec missae nec vesperae,

Dum cantetur finis.

Decus N.

Dum sitis insigne,

Postulo suffragia

De vobis iam digne.

Ergo mentem capite

Similem Martini,

Vestibus induite

Corpus peregrini,

Vt vos Deus transferat

Ad regna polorum,

Ibi dona conferat

Vobis beatorum.