1

Ecce torpet probitas,

Virtus sepelitur,

Fit iam parca largitas,

Parcitas largitur,

Verum vincit falsitas,

Veritas mentitur.

Omnes iura laedunt,

Et ad res illicitas

Illicite procedunt.

2

Regnat avaritia,

Regnant et avari,

Mente quivis anxia

Nititur ditari,

Cum sit summa gloria

Censu gloriari.

3

Multum habet oneris

Do das dedi dare:

Verbum hoc prae ceteris

Norunt ignorare

Divites, quos poteris

Mari comparare.

Omnes iura laedunt,

Et in rerum numeris

Numeros excedunt.