1

Versa est in luctum

Cythara Waltheri,

Non quia se ductum

Extra gregem cleri

Vel eiectum doleat,

Aut abiecti lugeat

Vilitatem morbi,

Sed quia considerat,

Quod finis accelerat

Inprovisus orbi.

Libet intueri

Iudices ecclesiae,

Quorum status hodie

Peior est quam heri.

2

Vmbra cum videmus

Valles operiri,

Proximo debemus

Noctem experiri;

Sed cum montes videris

Et colles cum ceteris

Rebus obscurari,

Nec fallis nec falleris,

Si mundo tunc asseris

Noctem dominari.

3

Per convalles nota

Laicos exleges,

Notos turpi nota

Principes et reges,

Quos pari iudicio

Luxus et ambitio

Quasi nox obscurat,

Quos caelestis ultio

Bisacuto gladio

Perdere maturat.

4

Restat, ut per montes

Figurate notes

Scripturarum fontes:

Christi sacerdotes

Colles dicti mystice,

Eo quod in vertice

Sion constituti

Mundo sunt pro speculo,

Si legis oraculo

Vellent non abuti.

5

Iubent nostri colles

Dari cunctis faenum,

Et praeferri molles

Sanctitati senum,

Fit hereditarium

Dei sanctuarium,

Et ad Christi dotes

Praeponuntur hodie

Expertes scientiae

Praesulum nepotes.

Si rem bene notes,

Succedunt in vitium

Et in beneficium

Terreni nepotes.

6

Veniat in brevi,

Iesu bone Deus,

Finis huius aevi

Annus iubilaeus.

Moriar, ne videam

Antichristi frameam,

Cuius praecessores

Iam non sani dogmatis

Stant in monte chrismatis

Censuum censores.