Sepe de miseria

Meae paupertatis

Conqueror in carmine

Viris litteratis.

Laici non sapiunt

Ea quae sunt vatis,

Et nil mihi tribuunt,

Quod est notum satis.

Poeta pauperior

Omnibus poetis

Nihil prorsus habeo

Nisi quod videtis:

Vnde saepe lacrimor,

Quando vos ridetis.

Nec me meo vitio

Pauperem putetis.

Fodere non valeo;

Quia sum scolaris;

Ortus ex militibus

Proelior ignaris;

Quia me nunc terruit

Labor militaris,

Malui Virgilium

Quam te sequi, Paris.

Mendicare pudor est,

Mendicare nolo,

Fures multa possident,

Sed non absque dolo.

Quid ergo miser faciam,

Qui nec agros colo,

Qui nec fur nec mendicus,

Neutrum esse nolo.

Nullus ita parcus est,

Qui non ad natale

Emat cappam, pallium,

Pelles, vel quid tale:

Sed non statim dissipat,

Nec custodit male,

Nec ducit ad quodlibet

Festum, sed annale.

Parcus pelles perticat,

Et involvit pannis.

Et indutas rarius

Multis servat annis

A laesura, maculis,

Notis, et a damnis

Fumi, vini, pulveris.

Et ignis et amnis.

Vidi quosdam divites

Nuper convenire,

De festivis vestibus

Gestu superbire,

Cum haberent pallia

Vetustatis mirae,

Quae Vlixes rediens

Posset reperire.

Color saepe palliis

Et forma mutatur.

Color, cum pro viridi

Rubrum conparatur,

Vel quod est interius

Foris regiratur,

Vel cum a tinctoribus

Color coloratur.

Forma, cum in varias

Formas sint mutata

Vestimenta divitum

Vice variata.

In nova fert animus

Dicere mutata

Vetera, vel potius

Sint inveterata:

Vidi quosdam divites

Famae satis clarae

Formas in multiplices

Vestes variare,

Contra frigus hiemis

Pallium cappare,

Veris ad introitum

Cappam palliare.

Cum hoc tritum saepius

Saepius refecit,

Et respectum saepius

Saepius defecit,

Noluit abicere

Statim, nec abiecit,

Sed parcentem tunicae

Iuppam sibi fecit.

Sic in modum Gorgonis

Formam transformavit,

Immo mirus artifex

Hermaphroditavit,

Masculavit feminam,

Marem feminavit,

Et vincens Tiresiam

Sexum tertiavit.

Parum sibi fuerat

Pallium cappare,

E converso deinceps

Cappam palliare,

Recappatum pallium

In iuppam mutare,

Si non tandem faceret

Iuppam caligare.

Hoc Galtherus subprior

Iubet in decretis,

Ne mantellos veteres

Vos refarinetis,

Renovari prohibens

Calce vel in cretis.

Hoc decretum vacat iam,

Sicut vos videtis.

Excommunicamus hos

Et recappatores

Et capparum veterum

Repalliatores

Et omnes huiusmodi

Reciprocatores.

Omnes anathema sint,

Donec mutent mores.