Anni novi rediit novitas,

Hiemis cedit asperitas,

Breves dies prolongantur,

Elementa temperantur.

Subintrante Ianuario

Mens aestu languet vario,

Propter puellam quam diligo.

Prudens est multumque formosa,

Pulchrior lilio vel rosa,

Gracili coartatur statura,

Praestantior omni creatura,

Placet plus Franciae regina.

Mihi mors est iam vicina,

Nisi sanet me flos de spina.

Venus me telo vulneravit

Aureo, quod cor penetravit.

Cupido faces instillavit,

Amor amorem superavit

Iuvenculae pro qua volo mori.

Non iungar cariori,

Licet accrescat dolor dolori.

Illius captus sum amore,

Cuius flos adhuc est in flore.

Dulcis fit labor in hoc labore,

Osculum si sumat os ab ore.

Non tactu sanabor labiorum,

Nisi cor unum fiat duorum

Et idem velle. Vale, flos florum!