1

Saevit aurae spiritus,

Et arborum comae fluunt penitus,

In frigore silet cantus nemorum;

Dum torpescit ver a sole,

Tepet amor pecorum.

Nunquam amans sequi volo

Vices temporum

Bestiali more.

En gaudia felicia,

Quam dulcia stipendia

Sunt haec horae

Nostrae Florae!

2

Non de longo conqueror obsequio;

Remuneror stipendio,

Laetor laeto praemio.

Dum salutat me loquaci

Flora supercilio,

Mente satis iam capaci

Gaudia concipio,

Glorior labore.

3

Mihi sors obsequitur non aspera,

Dum secreto in camera

Favet Venus prospera.

Nudam fovet Floram lectus,

Caro candet tenera,

Virginale lucet pectus,

Parum surgunt ubera

Modico tumore.

4

A tenello tenera

Pectusculo

Distenduntur latera

Pro modulo,

Caro carens scrupulo

Levem tactum non offendit,

Gracili sub cingulo

Vmbilicum praeextendit

Paululum ventriculo

Tumescentiore.

5

O, si forte Iupiter hanc videat,

Timeo, ne pariter incaleat,

Et ad fraudes redeat,

Sive Danaes pluens antrum

Imbre dulci mulceat,

Vel Europes intret taurum,

Vel et haec congaudeat

Rursus in olore.