1

Redivivo vernat flore

Tellus, quae diu marcuit,

Et vernali sol calore

Pulso brumae statu claruit,

Nam philomena dulciter

Dulcissimis concentibus

Delectat corda suaviter.

2

Estas nunc tenella vestit

Fronde nuditatem arborum,

Puellaris turba gestit

Florem contemplari nemorum,

Hanc sequatur cum gaudio

Iuvenum militia,

Dulcis et laeta concio.

3

Ergo laeti aspirantes

Dulcem rerum ad temperiem

Iocundemur gratulantes

Veneream ad blanditiem

Et aurea Cupidinis

Ad iacula, sit animus

Velox ad cultum virginis.