1

Salve ver optatum,

Amantibus gratum,

Gaudiorum

Fax multorum,

Florum incrementum;

Multitudo florum

Et color colorum

Salvetote,

Et estote

Iocorum augmentum!

Dulcis avium concentus

Sonat, gaudeat iuventus.

Hiems saeva transiit,

Nam lenis spirat ventus.

2

Tellus purpurata

Floribus et prata

Revirescunt,

Vmbrae crescunt,

Nemus redimitur

Lascivit natura

Omnis creatura;

Laeto vultu,

Claro cultu,

Ardor investitur;

Venus subditos titillat,

Dum naturae nectar stillat,

Sic ardor venereus

Amantibus scintillat.

3

O quam felix hora,

In qua tam decora

Sumpsit vitam

Sic politam,

Amoenam, iocundam!

O quam crines flavi!

In ea nil pravi

Scio fore;

In amore

Nescio secundam;

Frons nimirum coronata,

Supercilia nigrata

Et ad Iris formula

In fine recurvata.

4

Nivei candoris,

Rosei ruboris

Sunt maxillae;

Inter mille

Par non est inventa.

Labia rotunda

Atque rubicunda;

Albi dentes

Sunt nitentes;

In sermone lenta;

Longe manus, longum latus,

Guttur et totus ornatus

Est cum diligentia

Divina conpilatus.

5

Ardoris scintilla

Devolans ab illa,

Quam prae totis

Amo notis,

Cor meum ignivit,

Quod cor fit favilla.

Veneris ancilla

Si non curat,

Ardor durat,

Moritur qui vivit.

Ergo fac, benigna Phyllis,

Vt iocundar in tranquillis,

Dem os ori iungitur

Et pectora mamillis.