1

Ob amoris pressuram

Medentis gero curam

Amanti valituram;

Cor aestuat interius,

Languet mens quondam pura,

Affligor et exterius

Propter naturae iura.

2

Si cupio sanari

Aut vitam prolongari,

Festinem gressu pari

Ad Corinnae praesentiam,

De qua potest spes dari,

Eius quaerendo gratiam:

Sic quaero reformari.

3

Haec dulcis in amore

Est et plena decore,

Rosa rubet rubore,

Et lilium convallium

Tota vincit odore,

Favum mellis eximium

Dulci propinat ore.

4

Non in visu defectus,

Auditus nec deiectus,

Eius ridet aspectus,

Sed et istis iocundius

Locus sub veste tectus;

In hoc declinat melius

Non obliquus sed rectus

5

Vbi si recubarem.

Per partes declinarem,

Casum pro casu darem

Nec praesens nec praeteritum

Tempus considerarem,

Sed ad laboris meritum

Magis accelerarem.