1

Anno novali Mea

Sospes sit et gaudeat,

Arrideat, cui haec chorea

Inplicat, quam replico et praecino:

Pulchrior et aptior

In mundo non est ea.

2

Fervens illa Mea

Ignis est, sed suavitas

Et bonitas renitent ex ea;

Provocant me talia ad gaudia.

Tristorque cum suspiriis

Sub lite venerea.

3

Hospitalis Mea

Candida et rubea,

Amabilis; Venus amoris dea,

Me tibi subicio, auxilio

Egens tuo; iam caleo,

Quod pereo in ea.

4

Collaudate Meam

Pudicam, delectabilem,

Amabilem; amo frequenter eam,

Per quam maestus vigeo et gaudeo,

Illam prae cunctis diligo

Et veneror ut deam.