1

Veneris vincula

Vinctus sustineo,

Pereant iacula,

Quibus sic pereo!

Fixus sum aureo,

Figitur plumbeo

Florens virguncula,

Vnde scintillula

Salit de stipula,

Qua totus ardeo.

2

Flora, iam noveris,

Quod sim sollicitus;

Tui spes muneris

Mihi fit exitus,

Nam tibi deditus

Mihi sum perditus;

Mollis in asperis,

Caecus plus ceteris

Ad iubar sideris

Tui sum territus.

3

Venus amplectitur

Nigros et niveos,

Saepe traducitur

Per non idoneos,

Mores nunc aureos,

Nunc habet ferreos.

Amans dum fallitur,

Amor subvertitur

Merito dicitur

Metamorphoseos.

4

Amor mutabilis

Marcidus areat;

Verax et habilis

Floreus maneat.

Amor sic polleat,

Voto dum studeat,

Plus est amabilis;

Ergo sit similis

Animi vigilis:

Haec signum teneat.