1

Potatores exquisiti,

Licet sitis sine siti,

Et bibatis expediti

Et scyphorum inobliti,

Scyphi crebro repetiti

Non dormiant,

Et sermones inauditi

Prosiliant.

2

Qui potare non potestis,

Ite procul ab his festis,

Non est locus hic modestis.

Inter laetos mos agrestis

Modestiae,

Et est suae certus testis

Ignaviae.

3

Si quis latitat hic forte,

Qui non curat vinum forte,

Ostendatur illi portae,

Exeat ab hac cohorte:

Plus est nobis gravis morte,

Si maneat,

Si recedat a consorte,

Tunc pereat.

4

Cum contingat te praestare

Ita bibas absque pare,

Vt non possis pede stare,

Neque recta verba dare,

Sed sit tibi salutare

Potissimum

Semper vas evacuare

Quam maximum.

5

Dea deo ne iungatur,

Deam deus aspernatur,

Nam qui Liber appellatur

Libertate gloriatur,

Virtus eius adnullatur

In poculis,

Et vinum debilitatur

In copulis.

6

Cum regina sit in mari,

Dea potest appellari,

Sed indigna tanto pari,

Quem praesumat osculari.

Nunquam Bachus adaquari

Se voluit,

Nec se Liber baptizari

Sustinuit.