Celsi cunctiparens conditor aetheris,

Orbis principium, luminis editor

Inventorque boni, fons sine termino,

Audi quod precor et supplico servulus,

5

Plebis tu caput et gloria candidae,

Albis fulgida praetextaque vestibus

Agnum quae sequitur lotaque sanguine

De cunctis placet empta et data gentibus.

Hanc terris colit et praedicat omnibus

10

Votis accumulans optima gaudia

Concors ecclesia et vox modulantium

Festivo sociat carmina coetui.

Haec nunc curriculis vota sub annuis,

Per quos emineant et redeant dies,

15

Exponam breviter credita carmine,

Comprendens acies bellaque fortium,

Quorum, Christe deus, pro meritis mihi

Cunctorum veniam hic annue criminum.

Servo confer opem missaque desuper

20

Caecum de tenebris iam revocet manus.

Rector, nempe tuo nulla renititur,

Nulla est imperio dura potentia:

Armis tu poteris vincere fortibus,

Fallens ne zabuli vincat iniquitas.

25

Tandem sit satis ad Tartara per scelus

Cunctum perque nefas perque probra omnia,

Casu flebiliter tendere pessimo,

Oblectetque tuis vivere legibus,

Felix caelicolis permanet in quibus

30

Regem praesidiis vita perennibus.

Summum quando piis tu resides bonum,

Explet quos iugiter te sitiens amor,

Spei nil superest ad veniam mihi

Vitae nec potior suppetiis, nisi

35

Pressum tu releves, aeger et anxius

Succumbensque ruam mortis ad intima.

Munus nunc operis permodici tamen

Sanctorum innumero de populo tibi,

Rector quodque tuo profero nomini,

40

Gratum de sterili sit, rogo, carmine.

Ymnum personet hic mens humilis tibi,

Devotusque canat te modulans homo,

Vnam cui iugiter cum patre gloriam

Agmen praedicat in saecula lucidum.