1

Haec nunc, Christe, tuo, deus

Conscripsi breviter munere carmina,

Constans expetiit quae studio pervigili fides.

2

His digesta micant simul

Caelestis patriae et militiae agmina,

Summo perpetui quae radiant aethere luminis.

3

Quorum te veniam prece

Indignus rogitans obsecro criminum,

Multo supplicii namque premor perpetui metu.

4

Trinis ecce decenniis

Vitam dego miser, quintus et insuper

Aevi curriculis orbis adest atque meatibus.

5

Me nunc nil recolens boni

Egisse atque pii concutior nimis:

Curae nam stimulant horribiles mentis ad intima.

6

Lapsum iam releva, pater,

Tandem et praeteritis exue sordibus,

Squalet conscia quis mens nimiisque angoribus tremit.

7

Sanctorum retuli canens

Hic certamina praeclaraque martyrum

Vexilla ante oculos constitui signaque ovantium.

8

Horum glorificat, pater,

Sanguis te iugiter, mors loquitur pia,

Vivunt namque tuo praesidio et luce perenniter.