Linea, quae Iani prima est pariterque Decembris,

Tricenis pedibus binisque exporrigit umbram,

Vndenisque sequens pedibus mox umbra recisis

Tantum bis denis unoque extensa patescit.

5

Linea tumque pedes concidens tertia binos

Vmbris ipsa decem figit simul utque novenos.

Rursus et hinc Geminis sole excrescente fugatis,

Septem quarta pedes retinet mensura decemque.

Hac etiam binis umbra fugiente recisis,

10

Ter quinis quintam pedibus sua linea tendit,

Centrum tumque brevem iam sole regente duobus

Abscisis ternos denos sibi sexta retentat.

Caedendi hunc morem numeri servabis ubique.

Quae Februum mensura tenet sotiatque Novembrem,

15

Ter denis pedibus supremas colligit umbras.

Moxque novem constant pedibus denisque sequentes,

Linea tum septem atque decem sibi tertia tendit.

Quarta pedes pariter ter quinos colligit umbra.

Hinc pedibus ternis ac denis quinta patescit,

20

Scandentemque rotam undenis mox sexta coercet.

Cursibus Octobrem sibimet quis Martius aequat,

Octo pedes prima et bis denos linea figit.

Denos et septem complet statuitque secunda,

Tertia quindenis Phoebo ascendente tenetur,

25

Quarta decem excedens pedibus fugit agnita ternis

Mox etiam quinta undenis spatiata recedit,

Sexta novem pedibus pandit sua lumina deinde.

Quae tibi, September, florentem nectit Aprilem,

Bis denis umbram et senis docet orbita primam

30

In pedibus sub quindenis figitque secundam.

Ternis ac denis cursum quoque tertia frenat.

Vndenis crescens pedibus tum quarta recedit,

Quinta novem pedibus cursum clauditque patentem,

Septenisque suos componit sexta meatus.

35

Augustum et Maium iungit quae linea primum.

Bis denis umbrae pedibus meat atque quaternis,

Cum denis ternos excrescit moxque secunda,

Vndenis clarum concludit tertia cursum.

Quarta patet pedibus caelo tepefacta novenis.

40

Septem quinta tenet propriis finita sub umbris.

Sextaque tum quinis ferventi cessat in orbe.

Horarum sibi Quintilem quis Iunius aequat,

Bis denis prima in pedibus patet atque duobus,

Vndenisque means ostenditur inde secunda,

45

Tertia moxque pedes explet comprensa novenos,

Aestivo septem mox tendit quarta calore,

Quintaque tum pedibus conscendit linea quinis,

Hinc centro torrens terno sibi sexta retentat.