Aulae sidereae paralelos undique circos

Crinibus auratis nectit Titania lampas.

Vmbram bis luci parilem bis lance staterans

Sese bis tropicos ambarum vertit in auctus,

5

Ac sic distingens binis bis motibus annum

Regnat tetragonum pulcro discrimine mundum

Signis ambitum bis senis limite curvo,

Quae totidem menses terrenis usibus aptant.

Talibus articulis, quos circum tempora currunt,

10

Partibus octavis dico libraeque criuque

Nec non aegoceri, cancri praefixa tropea.

Tu, crie, concepti Christi tibi plaude triumphum,

Vendicet aegoceros nascentis gaudia verbi;

Lucis praecursor nascens in vertice cancri,

15

Libra conceptus, cernis praefata tropea.

Si quis corde pio mentis levaverit alas

Ac sensim tranet tenero theoremata lapsu

Intrans armoniam rerum ducente sophia,

Omnia perspiciet rationis acumine claro

20

Intus farta deo verbo loca tempora, totum

Mundum gestantem nascentis symbola Christi.

Verbum nanque deus processit virginis alvo

Lucis in augmento, quam noctis vicerat umbra,

Nos homines miseros paradisi luce remotos,

25

Olim commissae septos umbramine culpae,

Sponte relinquentes praeclara sedilia vitae,

Mortis perpetuae devinctos iure catenis,

Quo mortale genus lueret sua debita solvens,

Sentiret meritas inflata superbia poenas,

30

Restaurare volens priscasque reducere sedes.

Haec octava tibi bifrontis rite Kalendas

Insinuat typicas, dum vincit luce tenebras.

Octonus numerus divinos symfonat actus;

Nam dominus noster, quem tempus formulat omne,

35

Octavis natus, conceptus, morte reversus,

Octavis veteris subiit signacula legis,

Mundus in octava finem dabit omnibus unum

Cursibus annorum variis rebusque caducis

Sumpturus stabilem mutato schemate formam,

40

Dum genus humanum generali matre renatum

Pro limo terrae caelestia corpora sumet,

Densa seges virides miro teget ordine sulcos

Tellurisque novae facies revocabitur actu

Et rerum propriae consument omnia causae.

45

Haec sunt, quae tacite nostris in cordibus intus

Octoni numeri modulatur nabla sonorum,

Spiritus interior clamat nec desinit unquam

Semper concrepitans, quicquid semel intonat annus;

Haec scriptura docet, cui rerum concinit ordo.

50

Quae sibi nascendi tempus prudentia fecit,

Ipsa locum statuit, quo primum nata pateret.

Bethleem fertur quondam possessio David,

Regis psalmidici, genitoris origine Christi.

Salve, sancta domus, panis ditissima patrum,

55

Area caelestis divina fruge referta,

In qua natus erat, qui sustinet omnia, panis,

Panis perpetuus, quo vescitur aula superna:

In te manna pluit summis virtutibus aptum.

Felix illa domus, quae fraglat aromata vitae

60

Arcanisque suis paradisi prodidit escam.

Angelicus panis, quem primus perdidit Adam,

Vilibus in stabulis prono reperitur in antro.

Lucis praeclarae qui vestit sidera peplo,

Pannos induitur furvo sub culmine cruptae.

65

Quem nullus novit sensus nec mentis acumen,

Mandra boum vidit tenero velamine carnis.

Quae mens, quae virtus, superum quae facta sophia

In carnem poterit descensum dicere verbi,

Carnis et in verbum sublimia bimata nosse?

70

Vt deus aeternus factus caro lapsus ad ima,

Sic caro facta deus vere levis evolat alta.

Nate dei patris, cui mater virgo beata,

Cui genus egregium David rex atque sacerdos

Cuique remota domus septenis fulta columnis,

75

Sanctae scripturae cui fulget candida vestis,

Sanguine quem redimis cui mundus subditur omnis,

Vita, salus hominum, caelorum gloria summa:

Da nostro regi Karolo, cui sceptra dedisti,

Vt semper famulus tibi vivat mente benigna.

80

Prospera labentis vitae revolumina praesta

Atque simul tecum caelestis gaudia regni.

Magna dei genitrix, ter felix, sancta Maria -

Te laudant caeli, te votis inclytat orbis -:

Proxima sis Karolo tutrix, munimen et altum,

85

Qui tibi mirifice praeclaram fabricat aedem.

Aedes marmoreis varie constructa columnis,

Alta domus pulcre centeno normate facta.

Aspice polygonos flexus arcusque volutos,

Compages laterum similes, capitella basesque,

90

Turres, luriculas, laquearia, daedala tecta,

Obliquas tyridas, ialini luminis haustus,

Intus picturas, lapidum pavimenta gradusque,

Circum quaque stoas, armaria, pastaforia,

Sursum deorsum populos altaria circum,

95

Lampadibus plenas faros altasque coronas.

Omnia collucent gemmis auroque coruscant;

Pallia, cortinae circundant undique templum.

Ipse throno celso fultus rex prospicit omnes

Vertice sublimi gestans diadema paternum,

100

Plena manus sciptris enchiridon aurea bactra:

Heros magnanimus longaevus vivat in annos.