Scandere puppim

Transque meare salum

Coetum discipulorum

Quondam Christus iusserat.

5

Cedere vulgus

In sua quemque iubet;

Hinc montis subit alta,

Sic numen patris invocat.

Nocte sopora

10

Omnia torpuerant

Sulcabatque minaces

Puppis cerula gurgites.

Flamine laevo

Aequora ferbuerant;

15

Spes absumpta salutis

Tanta mortis imagine.

Aethera iamque

Lucifer impulerat,

Cum quartam stationem

20

Pernox miles inordinat.

Christus amico

Fluctibus in liquidis

Fert vestigia gressu

Seque horrentibus intulit.

25

Mox tremor artus

Occupat egelidos;

Clamor sidera pulsat;

Terror pectora verberat.

"En ego" Christus

30

Vt sacer intonuit,

Simon robore sumpto

Haec in famina prosilit:

"Si tua vere

Nos adiit pietas,

35

Noto me quoque iussu.

Tecum pergere praecipe.

Nam neque summo

Res gravis ulla deo,

Me siccosque videbis

40

Gressus ferre per aequora."

Mox miseratus

Annuit his dominus:

Fidens numine Petrus

Puppim desilit ocius.

45

Pendula ponto

Membra senex agitat

Innixusque marinis

Dat vestigia fluctibus.

Res nova mentem

50

Perculerat tremulam,

Tum discrimina pontus

Intentat fera fervidus,

Quaeque fidelem

Aequora sustulerant,

55

Paulatim liquefacta

Mox subsidere cerneres.

Corpore mersus

Iamque Petrus medio

"Iesu, nunc, bone," clamat

60

"His me deripe fluctibus."

Obvia Christi

Dextera quem rapuit,

Conscensaque liburno

Cedunt noxia flamina.

65

Nos quoque dudum

Praetumidum pelagus

Summi nomine Christi

Confisi penetravimus.

Iam fere cursus

70

Contigimus medios:

Ponti caerula tantum

Et caelum undique cernitur.

Anxius haurit

Pectora iamque pavor;

75

Tollunt aequora molem:

Incepti quoque paenitet.

Pande serenam,

Christe, tamen faciem,

Spes et respice lapsas:

80

Votis omnia cesserint.

Iamque potentem

Porge manum trepido:

Ausim scandere tecum

Quanquam torva pericula.