Haec cantabat papa Tascius solio Cornelii,

Graphium tenens vietis iam retunsum digitis,

Et detritis ludibundus scribebat in tabulis,

Quem ab Hostia conspexi sub portu Cartaginis.

Vnde plaudens letabatur imperator Karolus

Cum Francigenis poetis, cum Gallis bibentibus.

Ridens cadit Gaudericus supinus in lectulum,

Zacharias admiratur, docet Anastasius.

Quando simplex Iob Formosum condempnabat subdolum,

Quando largus sanctus Petrus varum Gregorium,

Quando castus sanctus Paulus incestum Georgium

Spiritus virtute sancti binis in sinodibus.

Vnde dudum conculcata gaudet nunc ecclesia,

Roma libera triumphans Tarquinios effugat,

Praesules deponunt arma, soli Christo militant,

Cum togata super ista Petrus tractat curia.

Tyrannus unde grassatur, Iezabel tendit amum,

Vicinus praedo laetatur, vir duplex allicitur:

Solus Petrus, Christo duce vincens, dampnat noxios:

Saphyram, Simonem magum, Herodem, Ananiam.