Qui cupiunt celsum domini conscendere regnum

Astrigeroque micare modo per secula cuncta

Et cupiunt vitare cahos tenebrasque perennes,

Quo manet interitus ingens ignisque perennis,

5

Quo luctus, gemitus, frigor, calor est sine fine,

Quo vorare malos vermis non desinit vivax,

Ad sacram properent, nitidam sub pectore mentem

Gestantes, celebrare diem, qua conditor orbis

E superis veniens nobis se pandere terris

10

Est dignatus et invisus adsumere carnem

Non dispexit, homo est factus de virgine natus:

Verus homo verusque deus de semine David.

Concepit genetrix virgo, post edidit virgo,

Virgo suum lactat genitum, quem sidus adorat,

15

Virgo tenet manibus, verbo qui cuncta creavit,

Tempora qui iussit, celi qui sidera finxit.

O miranda dies cunctisque colenda per orbem,

O veneranda dies, celebrat quam climate tensa

Ecclaesia quadro toto de corde per evum.

20

Hanc chorus angelicus magno cum murmure nato

In terris domino reboare per ethera coepit,

Vocibus excelsis clamantes: "Gloria celso

Et pax semper erit homini pia cuncta volenti".

Ad hoc cum studio cuncti concurrite festum,

25

Omnis ovans aetas, pueri iuvenesque senesque;

Currat anus, virgo, vitricus, noverca socerque,

Garrulus et mimicus, bucco pariterque Pelignus,

Pauper, egenus, inops pariter cum divite gaza.

Dux ciliarcus et eximius cum semine regis

30

Rex, regina, matrona potens cum paupere turba,

Rusticulus, emptor seu venditor, ethnicus, exul,

Advena, mendicus, peregrinus et incola terrae,

Vocibus excelsis domino super omnia grates

Solvite cantantes magno cum murmure laudem.

35

Concrepet omnis in excelso per compita mundi,

Terra simul reboet, caelum, mare, sidera cuncta,

Turba sacerdotum clare sympsalmate cantent;

Vestibus induti sacris radiantia vasa

Producant auro rutilo, depicta lapillis,

40

Serica quos ornant †teretis et candida lina,

Bratea cum gemmis, varius quos ornat amictus,

Quos operit depicta cicladis murice tincta.

Excelsas domino cantent in saecula laudes

Alternisque modis divina poemata psallant.

45

Haec est magna dies, tribuit quae lumen in orbem,

Ista dies mundat totum de crimine mundum.

Hec est illa dies, dudum quam visere vates

Desideraverunt, norit quae pellere morbos,

Pellere quae norit tetras de corde tenebras.