Hic rutilat species Nithardi picta sagacis,

      Nomen rectoris qui modico tenuit,

Eheu quod subito in bello rapuit gemebundo

      Mors inimica satis seu furibunda nimis:

5

Invidia siquidem multatus hostis iniqui,

      Qui primus nocuus perstitit innocuis.

Astu nam belli viguit quasi fortis Asilas

      Nec non ex sophia floruit ipse sacra.

Extitit elato rigidus, miti humilisque,

10

      Contra commissum pacificusque gregem.

Cuius de Karoli genio processit origo

      Nobilis ac celsa Caesaris egregii.

Occubuit Iuli octavo decimoque Kalendas

      Hostili gladio; hac requiescit humo.

15

Hos quicumque legis versus, miserere suique

      Dic: "Animae ipsius det veniam dominus".

Iam quia sublatus terris regione locatus

      Sit, precibus, sancta, hocque frequens rogita,

Donec e tumulo salient cineres quoque vivi,

20

      Corpore suscepto quo reparatus eat

Ad loca sanctorum fultus hinc inde maniplis

      Angelicis sanctis cum patribus reliquis.