O sacer, e nostris, venerabilis, affuit unus,

      Qui mihi parte tua dixit habere vale.

Insuper innotuit cupientem cernere nostram

      Te faciem, nostro colloquioque frui.

5

Quam tibi visuram cedo cum corpore parvo

      Instanti ebdomade, credo, Iovisque die.

Ipsa etiam proprium noscas remeare locellum

      Me tantum velle propitiante deo;

In quo multiplicem tibi posco manere salutem

10

      Hic et in aeternum congeminando bona.

Iam quia hic fulges studiis, niteas super astra,

      Quo caritas lampat ac bonitas redolet.

Hoc feriendo tuus deposcit labra gemella

      Sidera suspensos alta tenens oculos.

15

Fundito tuque preces pro me, venerande, sacratas,

      Dum stas altare, o sacer, ante sacrum.

Quod supplex rogito vultu tellure reflexo:

      Nec ego reddendo segnis eroque vicem

Inque meis parvis dominum precibus rogitando

20

      Stans coram sancti Richarii tumulo.