Alme deus, metuendo tibi plebs concinit odas

Cuncta secli innumeras, caelorum calma caterva

Imperioque tuo famulatur cuncta sacrato.

Delius, ignivomos qui spargit ab ethere spicos

5

Telluris gremium, temet conlaudat in aevum;

Roscida nempe soror Solis tibi carmina pangit,

Lumina cuncta poli, nix, arbos, flumina fontis,

Pennatae volucres volitando per arva meantes,

Quadrupedes animae necnon repentia terrae.

10

Terrarum proceres ac regum celsa potestas,

Lar quoque, pisciculi, lymphae, venti pluviaeque,

Bestiolae, montes, rivi, flores, mare, campi,

12a

Cum senibus iuvenes terrarum rura colentes

12b

Te venerando colunt, recolendo te venerantur,

12c

Pangendo psallunt, psallendo carmina pangunt.

Israhelis laetus te laudat grex universus;

Tres pueri regis iussu Nabugodonosoris

15

In lacum missi laudum tibi carmina promunt.

Summa patris bonitas hominumque redemptio vera,

Quicquid patrasti cum patre et flamine sancto,

Te recolit, regem caeli testatur adesse:

Te caelum supra, tellus te laudat et infra;

20

Quicquid terra vehit, quicquid mare, quicquid Olymphus,

Te siquidem poscunt, venerantur, amant et adorant.

Angelicus coetus divino lumine fultus

Fascibus ethereis ardendo nobile psallit

Grates eximias et munia sacra ministrat.

25

Post quem turba patrum, post patres lingua videntum

Te quoque glorificat, semper tua iussa perimplet.

Hinc duodena phalanx in summis laudat adorans

Discipulum, in terris quae olim tua docmata prompsit

Gentibus orbicolis partes per quatuor orbis.

30

Testes aegregii constricti tympora sertis

Tibiciant grates pumpam cosmi adnihilantes,

Per te tripudiant, laeti te semper adorant.

Pontificum proceres confessorumque coortes

Con sociis pariter temet venerantur ovanter,

35

Qui illos glorificas illorum gestaque sacras.

Hinc monachum patres normam Christi retinentes

36a

Gaudia cosmi huius celsi pro munere regni

36b

Omnia spernentes, temet multum venerantes

36c

Non reticent labiis pangendo carmina laudis

Alloquio recti, divino munere pleni;

In terris resident, lacrimando crimina deflent.

Ordine subpremo nam virginis obviat aetas

39a

Et tibimet vastas non cessat reddere grates

40

Ast temet sequitur, quoquo vestigia mittis.

Hinc diadema cluens capitis sub vertice gestat,

Cum sanctis residens, temet per secula cernens.

42a

Mirantur cuncti specimen summae deitatis

42b

Concrepitant sonitum manibus prodendo serenum

42c

Terrigenae gentes temet multum venerantes

Vnanimes cuncti letantur vocibus altis

Ac resonant laudes iubilorum carmina fantes.