1a

Psalle symphonizando Christo regi sidereo

Qui sanctis rutilas tribuit per saecla coronas.

1b

Inter quos Cassianum confessorem praecipuum

Ditavit super astra poli splendore perenni.

2a

Hic tenebrosi

Culmina regni

Lumine Christi

Tempsit herilis.

2b

Nam redimitus

Stigmate sacro

Virtutibus almis

Floruit isdem.

3a

Hortensem populum praesule cassum

Poscentem variis vocibus ipsum,

3b

Summum quo regeret pontificatum,

Rexit celsithroni iura secundum.

4a

Postquam sedi pontificali

Inhaereret, astitit illi

Per visum martyr Laurentius orbe colendus,

4b

Hortans illum, ut sibi templum

Consecraret, quem reparata

Iam caeli certo cognoverat arce locandum.

5

Confestim paruit monitis per cuncta serenis;

Extorris fieri demum coepit meditari.

6a

Hic populari

Voce gementi

Laetus Egypti

Rura reliquit

6b

Ac Heduorum

Post iter artum

Postque laborem

Venit ad urbem.

7a

In qua Simplicio praesule functo

Bis denis viguit inclytus annis.

7b

Cuius albicolor petra sepulcri

Ostendit labari rubentis.

8a

Idem sanctus caespite tectus

Cum Germano iure beato

Est verbis usus (mirabile) vir memoratus.

8b

Per quem nobis, Christe, benignum

Semper cunctis subsidium fer,

Qui solus regnas, per saecula cuncta gubernas.