1

Agnus et leo, mitis et terribilis,

Aquila, vermis, excelsus et humilis,

Salvator mundi, Christus dei filius,

Nobis ut fiat precamur propitius.

2

Bonus magister, magnus pastor ovium,

Botrus in ligno portatus in heremum,

Salvator mundi, Christus dei filius,

Nobis ut fiat precamur propitius.

3

Caelestis Adam, fons vitae et ostium,

Custos Israel vigil in perpetuum,

Salvator mundi, Christus dei filius,

Nobis ut fiat precamur propitius.

4

Deus et homo, primus et novissimus,

Dilectus dei patris primogenitus,

Salvator mundi, Christus dei filius,

Nobis ut fiat precamur propitius.

5

Emmanuhelis nuncupatus nomine,

Erectum cornu David sancto semine,

Salvator mundi, Christus dei filius,

Nobis ut fiat precamur propitius.

6

Filius dei factus ex muliere,

Factus sub lege praesignato tempore,

Salvator mundi, Christus dei filius,

Nobis ut fiat precamur propitius.

7

Gaudium magnum ortum omni populo,

Gentium vitae sola expectatio,

Salvator mundi, Christus dei filius,

Nobis ut fiat precamur propitius.

8

Haeres parentis, per quem fecit saecula,

Hostia sancta, medicus, iustitia,

Salvator mundi, Christus dei filius,

Nobis ut fiat precamur propitius.

9

In maiestate venturus cum angelis

Iudicaturus de vivis et mortuis,

Salvator mundi, Christus dei filius,

Nobis ut fiat precamur propitius.

10

Kaput totius corporis ecclesiae,

Kaptivitatis redemptor de carcere,

Salvator mundi, Christus dei filius,

Nobis ut fiat precamur propitius.

11

Lapis electus, sanctum semen Abrahae,

Lux mundi, magna salus, sol iustitiae,

Salvator mundi, Christus dei filius,

Nobis ut fiat precamur propitius.

12

Mons domus dei in vertice montium,

Manus excelsa, dextera et brachium,

Salvator mundi, Christus dei filius,

Nobis ut fiat precamur propitius.

13

Natus pro nobis fructus ventris virginis,

Nuntius magni consili et foederis,

Salvator mundi, Christus dei filius,

Nobis ut fiat precamur propitius.

14

Ortus ex alto, visitator hominum,

Ovis in modum ductus ad patibulum,

Salvator mundi, Christus dei filius,

Nobis ut fiat precamur propitius.

15

Panis caelestis, sacerdos et victima,

Petra percussa, verbum, sapientia,

Salvator mundi, Christus dei filius,

Nobis ut fiat precamur propitius.

16

Qui crucifixus surrexit a mortuis,

Qui interpellat pro nobis in caelis,

Salvator mundi, Christus dei filius,

Nobis ut fiat precamur propitius.

17

Rex magnus regum, dominus dominantium,

Regnans in domo Iacob in perpetuum,

Salvator mundi, Christus dei filius,

Nobis ut fiat precamur propitius.

18

Spiritus vultus nostri, Christus dominus,

Sub cuius umbra vivimus in gentibus,

Salvator mundi, Christus dei filius,

Nobis ut fiat precamur propitius.

19

Thronis et cunctis caelorum virtutibus,

Tribubus, linguis presides et plebibus.

Salvator mundi, Christus dei filius,

Nobis ut fiat precamur propitius.

20

Vnigenitus paternae substantiae,

Vnctus a patre oleo laetitiae,

Salvator mundi, Christus dei filius,

Nobis ut fiat precamur propitius.

21

Xristus pax nostra, via, summa sanctitas,

Xilon aeternae vitae, virtus, veritas,

Salvator mundi, Christus dei filius,

Nobis ut fiat precamur propitius.

22

Ymnistae vili vita, resurrectio,

Dominus iudex parcat in iudicio,

Salvator mundi, Christus dei filius,

Nobis ut fiat precamur propitius,

23

Zoes ut claro ditatum denario

Zonton in sancto collocet consortio.

Salvator mundi, Christus dei filius,

Nobis ut fiat precamur propitius.