1

Audite versus parabole,

Quod quondam puero contigit:

Dum iret in solitudine

Aprum cum canibus querere,

Invenit illum celeriter.

2

Per spacia multa dum curreret,

Venator eum persequeret,

Feroce ira repletus est,

Pergebat, eum dum perderet,

Occurrit, gladio fixus est.

3

Dum simul bellum exererent,

Vis apri eum obprimeret,

Retrorsum terga reversus est,

Pedibus coluber pressus est,

Momordit illum pestifere.

4

Extinctus pedibus coluber

Venenum unxit mortifere;

A ferro aper interiit,

Reversus illoque pariter:

Dederunt mortem ad invicem.

5

Nuntius matri adveniens;

Perrexit puerum querere.

Invento corpore genetrix

Pugnoque verberans pectora

Lacrimas fundens locuta est:

6

Si tantum vixeras, fili mi,

Vixisti quantum, dulcissime,

Iterum tantum et medium,

Annumque unum expleveras,

Annorum centum extiteras.