1

Anima nimis misera,

Infelix, scelestissima,

Probra gessisti omnia,

Tormenta lues pessima.

Lugenda nimis, quia aeternis es

Torquenda cruciatibus.

2

Brevi pro luxu seculi

Plorabis in perpetuum,

Frustraque ab imo pectoris

Altis gemes suspiriis:

Succurre, Christe, quia benignus es,

Et da misericordiam.

3

Calorem que libidinis

Luxuriando reficis,

Stridentibus in mediis

Flammis rugitus tribuis.

Lugenda nimis, quia aeternis es

Torquenda cruciatibus.

4

Dedisti gule operam

Saturata ad crapulam,

Serpentibus flammivomis

Rodenda in visceribus.

Succurre, Christe, quia benignus es,

Et da misericordiam.

5

Elegeras in gloria

Vana letari modicum,

Ad imum usque fetidi

Humilianda baratri.

Lugenda nimis, quia aeternis es

Torquenda cruciatibus.

6

Fornicata es post idola

Sectando avariciam,

Implenda plumbo, sulphure,

Pice, nigro bitumine.

Succurre, Christe, quia benignus es,

Et da misericordiam.

7

Gaudens que malis proximi,

Invidens bonis socii,

Amasti lutum nimium,

Dirum lues iudicium.

Lugenda nimis, quia aeternis es

Torquenda cruciatibus.

8

Hesisti omni vicio,

Omni digna supplicio,

Quapropter sine venia

Torqueberis per secula.

Succurre, Christe, quia benignus es,

Et da misericordiam.

9

In die, quando misera

Hoc absolveris corpore,

Cogita, quam terribiles

Tibi occurrent demones.

Lugenda nimis, quia aeternis es

Torquenda cruciatibus

10

Kaminus ignis torridi,

Vermes mortem inpavidi,

Nix, grando, gelu, glacies,

Pruina te suscipient.

Succurre, Christe, quia benignus es,

Et da misericordiam.

11

Laudes boni dabunt deo,

Ardebis cum diabolo,

Et cui culpa similis,

Pena plecteris simili.

Lugenda nimis, quia aeternis es

Torquenda cruciatibus.

12

Magnus erit clangor tube,

Quo mortui vivent seculo.

Stolas binas iusti sument,

Dupla morte tu peries.

Succurre, Christe, quia benignus es,

Et da misericordiam.

13

Nulla erit susceptio

Salutis vel remedii

Ianua clausa thalami

Completis sponsi nuptiis.

Lugenda nimis, quia aeternis es

Torquenda cruciatibus.

14

O quam infelix anima

Privata hoc convivio,

Quae ultra in memoriam

Non revertetur domini.

Succurre, Christe, quia benignus es,

Et da misericordiam.

15

Pete deo clementiam

Ex toto corde, veniam,

Fructusque poenitentie

Dignos age in corpore.

Lugenda nimis, quia aeternis es

Torquenda cruciatibus.

16

Quam putas iustus dominus

Digna donabit meritis,

Si pro verbo inutili

Vindictam dat iudicii!

Succurre, Christe, quia benignus es,

Et da misericordiam.

17

Recogita, miserrima,

Quae egisti in seculo,

Et plora ante dominum,

Vt det misericordiam.

Lugenda nimis, quia aeternis es

Torquenda cruciatibus.

18

Sola est namque gratia,

Lapsi qua solent surgere,

Qua publicanus, meretrix,

Latro salvatur credulus.

Succurre, Christe, quia benignus es,

Et da misericordiam.

19

Tua pone in faciem

Peccata gesta noxie

Et poenas tibi debitas,

Sanctorum sedes lucidas.

Lugenda nimis, quia aeternis es

Torquenda cruciatibus.

20

Venturum regem conspice

Paterna in maiestate,

Ignem, qui iusti iudicis

Vultum praeibit fulgidum.

Succurre, Christe, quia benignus es,

Et da misericordiam.