1

Nunc tibi, Christe,

Carmina leta,

Laudes canamus

Pectore toto

Menteque pura

Perpete voto.

2

Laus tibi semper,

O deus alme,

Mitis ubique,

Magnus in alta

Sede polorum,

Sanctus in aevum.

3

Vnica patris

Almaque prolis,

Sophia, virtus,

Sola salutis

Spes, vita nostra,

Pacis et auctor.

4

O deus orbis

Omni creator

Cum patre regnans

Perpes in evum,

Flamine sancto,

Verus et unus.

5

O deus alme

Altipotensque

Nomine trinus

Namque, sed unus,

Te mare laudat,

Terra polusque.

6

Qui patris alta

Sede per alvum

Virginis almam

Inviolate

Natus in orbem

Nostra petisti.

7

O quae stupenda

Res fuit acta:

Conditor orbis

Est homo factus

Estque creatus

Ipse creator!

8

Et deus altus

Omnipotensque

Vbera suxit

Parvula matris,

Presepe parvus

Pausat ut infans,

9

Qui regit omne

Atque cibavit,

Quidquid ubique

Vivit, ubique

Namque per illum

Omnia constant.

10

Crevit ut etas

Certe per annos

Terque decennis

Tinctus in undis

Gratia plenus

Iordanis amnis.

11

Spiritus almus

Vtque columba

Venit in illum,

Vox sonat atque:

"En meus iste

Filius est iam."

12

Postque peregit

Plurima mundo

Signa salutis,

Suscitat atra

Morte peremptos

Mentis ut auctor.

13

Ac documentis

Agmina plebis

Tramite vite

Traxit ad alta

Regna polorum

Rite magister.

14

Et pius auctor

Plurima postquam

Verba salutis

Fudit in aures

Dulcibus odis

Discipulorum,

15

Tempora cernens

Tota peracta

Curriculorum,

Vt redimeret

Sanguine fuso

Secula cuncta,

16

Tunc homo Christus,

Agnus honestus,

Immaculatus,

Hostia pura,

Sponte volebat

Namque moriri.

17

In cruce passus,

Inde levatus

Atque sepultus

In monumento

Marmore tecto

Maximus heros.

18

Venerat et post

Tristia facta

Tertia solis

Lux pia terris,

Surgit ab atra

Morte redemptor.

19

Cernit et illum

Turba suorum

Discipulorum

Et crucis alme

Vulnera dura

Vidit in illo.

20

Hoc fuit utque

Totus in illum

Crederet orbis,

Quem quoque celi

Scandere regna

Viderat alta.

21

Laudis honor cui

Sit, rogo, semper

Cum patre summo

Perpes in evum,

Gloria, virtus

Iam sine fine.

22

Sophia patris,

Christe magister,

Munera lingue

Dulcia nostre

Da, deus auctor

Rexque redemptor.

23

Semina verbi

Sparge per orbem

Gentibus, ut te

Rite canentes

Laudibus ornent,

Lucis amator.

24

Psallite summo,

Psallite regi,

Psallite Iesu,

Psallite Christo,

Psallite vivo,

Psallite vero.

25

Osanna in altis,

Osanna in astris,

Osanna in arvis,

Osanna in undis,

Osanna in istis,

O Deus, odis.

26

Gloria patri,

Gloria nato,

Gloria sancto,

Spiritui, qui es

Summa potestas

Sanctaque virtus.