1

Quique cupitis audire ex meo ore carmina,

De summo deo nunc audite gloriosa famina

Et de adventum Antichristi in extremo tempore.

2

Antichristus est venturus permitente domino,

In Babilonia nascetur conceptus de diabolo,

Dan de tribu erit ortus ex Ebreorum populo.

3

Triginta annos tunc latebit incognitus a populo,

Duos annos tunc regnabit et uno et dimidio,

Fortis potestas ei datur in presenti seculo.

4

Modo cuncti abscultate precepta apostolica:

Nemo vobis iam seducat per suam epistolam

Nec per sermonem nec per signa nec per vana gloria.

5

Enoc namque missus dei cum Helia pariter

In illo tempore tunc mortem venient suscipere;

Antichristus hos occidet permitente domino.

6

Tribus diebus tunc iacebunt eorum sancta corpora,

Die tercia resurgent domini imperio,

Sicque gentes predicabunt ne credant diabolo.

7

Et in celum sic ascendunt, reclamant ante dominum,

Vt eorum fuso sangui divina fiat ultio,

Et vindicta facta erit de maligno spiritu.

8

Ihesus Christus deus noster, qui redemit seculum,

Ipse mitet ex ore suo gladium fortissimum,

Ipse occidet Antichristum perdicionis filium.

9

Tunc reddetur pax in terra quadraginta diebus,

Tunc erit dominus venturus, vident omnes occuli,

Tunc omnis genus, tribus, lingua venit ad iudicium.

10

Tunc aparebit crux in caelo, signum amirabile,

Iudea nequa et pagana et eresea dogmata

Absque dubio peribunt, qui crucem et fidem deridunt.

11

Virtutes celi .......................... movebuntur pariter,

Cum dominus tunc iudicabit unumquemque secundum sua merita:

Soli iusti salvabuntur propter sancta opera.

12

Civitas siquidem illa valde est mirabilis

Portas habet quater ternas, fundamenta totidem,

Non lumen solis neque lune nec de ulla sidera,

Set claritas summi dei semper hanc illuminat.

13

Ierusalem, civitas dei et paradisi claritas,

Vbi regnat Christus deus cum sanctorum animas,

Sine fine tunc regnabunt in eterna requie.

14

Homicide et criminosi intus non recipitur,

Set caos magnum inter eos; in atrocis tenebris

Omni ora "Ve! Ve!" clamant et mitunt voces lugubras.

15

Nec pavescant firma corda que, cum hec audierint,

Sed virtutes imitentur, que in celis coronant,

Vt evadant pena dira et amplectent supera.

16

Nam de pena reproborum ...........................

Quos mors secunda gustaverit, non erit ulla requies,

Cum Satan semper ardebunt in stagnum ignis et sulphuris.

17

Omnipotentem deprecemur cuncti devotissime,

Vt a pena infernali dignet nos eripere

Et ad gaudia superna sinat introducere.

18

Gloriam Christo canamus, gloriam paraclito,

Vna patri filioque simul individuo,

Cuius honor et potestas regnat ante tempora.