Missus sacer a supernis ad Mariam angelus

Castitatis pubertatem dictis his affatus est:

"Ave, virgo gloriosa, plena dei gratia.

Spiritus divinus tuam implet innocentiam,

Regum rex egrediatur ut de tuo utero

Tanquam sponsus speciosus de cubili proprio.

En concipies, Maria, pariesque filium,

Radius quem solis atque luna tremit aurea,

Pelagi metuunt aque terreque substancia."

Angelo hec prosequente monitis dulcissimis,

Virgo credidit et dixit: "En ancilla domini;

Fiat mihi, ut dixisti, et sim genitrix dei."

Modulis nos ergo, fratres, dulcibus et consonis

Hominis deique matrem salutemus virginem,

Vt suam pro nobis prolem deprecetur iugiter.

Salve semper benedicta tu in mulieribus,

Que papilla deum nostrum lactavisti carnea,

Quem gestare meruisti inter sacra viscera.

O Maria, puellarum omnium sanctissima,

Aufer clades famulorum malaque presentia,

Que pro vita criminosa patimur assidue.

Vnde supplices rogamus, tua prece subleva

Filioque representa in eterna gloria,

Quos interna reos mortis facit conscientia.

Praestit hoc pater eternus atque unigenitus

Procedensque ab utroque spiritus paraclitus,

Est deus qui semper unus per eterna secula.