Hug dulce nomen, Hug propago nobilis

Karli potentis ac sereni principis,

Insons sub armis tam repente soncius

Occubuisti.

5

Sed cur adire Karolum presumeres,

Quem Hludovicus, imperator inclitus,

Regem libenter visus est ex filio

Constituisse?

Sed non ob hoc tu perforandus lanceis,

10

Nec membra tua lanianda fuerant,

Cum plus prodesse quam nocere cuique

Semper amares.

Nam rex Pipinus lacrimasse dicitur,

Cum te vidisset ullis absque vestibus

15

Nudum iacere turpiter in medio

Pulvere campi.

Quin immo de te subsecutus addidit:

"Hunc si vidissem sospitem nunc corpore,

Talenta centum non placerent aurea

20

Hoc michi quantum!

Karroff oneste collocetur tumulo,

De quo sacerdos extitit ac monachus,

Et ubi vivens postulavit mortuum

Se sepeliri".

25

O quam venustam, quamque pulcram speciem

Circumferebas, omnibus pre ceteris,

Cum plus prodesse quam nocere cuique

Semper amares.

Non crimen ullum, non rapinam quamlibet

30

Tu perpetrasses, cum fores mitissimus,

Cum plus prodesse, quam nocere cuique

Semper amares.