"Dic, Capuane, mihi, quali sub principe sistis?"

"Tu prius ede, rogo, quis sis, qui talia queris".

"Sum prorsus ratione vigens numerumque recensens".

"Angelus atque deus pariterque homo dicitur istud;

5

Impar et ambiguus finis, necnon minus aequus.

Non igitur, quodcumque subest generi, simile id fit;

Finis ob hoc dubius, quoniam discretio nulla".

"Attamen est princeps Atenolfus ad astra refusus,

Sollemnis princeps sollemni nomine fulgens

10

Praesago quodam fausto divinitus acto,

Vt corpus virtus, nomen quoque vis animaret.

Ecce etenim Atenolfus <ternis> terque figuris

Nomine dum constet, fiat si forte reflexim

Octava et prima ac sexta et terna atque secunda

15

Ebdad et quinta nec non quarta atque suprema,

Auditur verbis aequis legiturque "valet fons".

Hinc iterum octava et prima ac sexta atque triade

Postque secunda conexa ad quintam tramite recto

Auditur verbis aequis legiturque "valeto".

20

Ecce "valeto" suis dicit, qui sorte valet fons;

Fons Atenolfus enim est magnus dulcissimus amnis,

Quo terris haustu non ullus dulcior alter".