Stirpe, Maria, regia

1

Procreata,

Regem generans Iesum,

2

Laude digna

Angelorum sanctorum,

3

Et nos peccatores

Tibi devotos

Intuere benigna!

4

Tu pios patrum mores ostentas in te,

Sed excellis eosdem.

5

Patris tui Salomonis

In te lucet sophia,

Et Ezechiae

Apud deum cor rectum,

Sed numquam in te corrumpendum.

6

Patris Iosiae adimplevit

Te religiositas.

Summi etiam

Patriarchae te fides

Totam possedit, patris tui.

7

Sed quid nos istos

Recensemus heroas,

8

Cum tuus natus

Omnes praecellat illos

Atque cunctos per orbem?

9

Nos hac die

Tibi gregatos serva,

Virgo, in lucem mundi

Qua prodisti

Paritura caelorum lumen.