Laudate altithronum, pueri, laudate tonantem.

Sit magnum domini benedictum in saecula nomen.

Solis ab exortu dominum laudate potentem,

Solis ad occasum in hymnis persistite laudum.

5

Excelsus gentes dominus supereminet omnes,

Eius et astriferos transcendit gloria caelos.

Quis domino est similis, sedes cui perpes in altis?

Respicit ast humiles caelo terraque benignus,

Maerentes inopesque a rudere tollit eosque

10

Primates inter populi sublimat opimos.

In sterilem habitare domo miseratur et amplo

Laetari tribuit natorum germine matrem.