Qui sacra vivaci studio domicilia lustras,

Noscendi tua tangit amor si pectora, quorum

Haec fuerit procerum Christo adquisita labore

Vrbs preclara viris, seu quis has primus ad oras

5

Advexit lumen, sublato errore vetusto,

Almiflue sollers de vero oriente fidei:

Perlege subiectum, breviterque docebere, carmen.

Cum Petrus aeterni dux summus Romula regis,

Quae caput orbis erat, ad moenia finibus omni

10

Schemate virtutum plenus venisset eois,

Claros quosque viros, summas caelestibus armis

Qui caperent arces, ad vitae gaudia mittit.

E quorum numero Clemens vocitatus, ut ille

Qui Rome Petro successerat, intulit urbi

15

Huic, quam olim Mettis veteres dixere coloni,

Aegregius praesul divina voce salutem,

Primusque hic domini digne fundavit ovile,

Aurea transmittens populis exempla futuris.

Iusti successit merito, cui vita vocamen

20

Caelestis tribuit, caelesti dogmate pollens.

Tertius ecclesiam Felix feliciter auxit.

Quartus adest Patiens, bene quem patientia compsit.

Hinc fulsit Victor, cui dat victoria nomen.

Hunc sequitur sextus simili cognomine praesul.

25

Septimus Haebreo est Simeon de sanguine cretus,

Sambatus octavus bene mystica sabbata servat.

Post hos, Ruffe, venis flammis rubicundus amoris.

Adelphus decimus fratrum dilector opimus.

Hinc Firminus erat, cui firmum robore pectus.

30

Hos tu subsequeris duodecimus, alme Legonti.

Floruit hinc Auctor donis caelestibus auctus.

Epletus hanc decimus tenuit quartusque cathedram.

Claruit hac decimus quintusque Vrbicius urbe.

Post Bonulus bonitatis opus de more peregit.

35

Trivisti assidue post limina sancta, Terenti.

Octavus decimus iam Gunsolinus habetur.

Inde capis, Romane, decus venerabilis aulae.

Post Fronimus sanctum sapienter rexit ovile.

Grammatus instruxit large de grammate plebem.

40

Emicat ecclesiae Danaus Agatimber in aede.

Post hos Sperus erat, quem spes fulcibat ab altis

Vilicus internas servat moderamine villas.

Vicenus quintusque Petrus dat famina plebi.

Et genus et fulgens Agiulfum vita decorat.

45

Hinc fuit Arnoaldus manans a stirpe Sycambra.

Christiculum servanda capis post, Papule, septa.

Splenduit Arnulfus dehinc ampla luce beatus.

Inde Goericus praeest, vocitatus et Abbo.

Post Godo terdenus servat pia culmina primus.

50

Subsequitur sancto Chlodulfus germine cretus.

Alter adest rursus praesul venerabilis Abbo.

Aptis Aptatus clerum moderatur habenis.

Ostendit Felix populis felicia regna.

Eximius claret factis Sigibaldus opimis.

55

Nobilis in cunctis papa Chrodegangus habetur.

Iam nunc tricenus pastorque octavus herili

Auxilio fultus trahit ad pia pascua vitae

Angelramnus oves: quo tempore maximus armis

Rex Carolus sensu, formaque, animoque decorus,

60

Italiae accepit Christi de munere sceptrum.

Quos simul excelsi, Stephano poscente beato,

Protegat atque regat felices dextra per aevum.