Ampla mihi vestro est humili devotio servo

Praeceptis parere tuis, celeberrime regum,

Quem dedit omnicreans rector miseratus ab altis

Christicolum populis defensoremque patremque.

5

Sit licet effectus modicis pro viribus impar,

Ingens ardenti tamen est sub corde voluntas.

En iutus patris Benedicti mira patrantis

Auxilio meritisque piis, vestrique fidelis

Abbatis dominique mei, etsi iussa nequivi

10

Explere, ut dignum est, tamen, o pietatis amator,

Excipe gratanter, decus et mirabile mundi,

Qualemcumque tui famuli, rex magne, laborem;

Quodque sacro nuper mandasti famine condi,

Nunc opus acceptans, rutilo comitare favore.

15

In quo si quid erit labis vitiique nocentis,

Illud vestra sagax nimium sapientia purget.

Vtque legi per sacra queat domicilia Christi,

Nullius titubante fide, si sensibus altis,

Enixe ut cupio, vestris utcumque placebit,

20

Firmum oro capiat vestra sanctione vigorem.