Se primum quatiens strepit

Gallus, cum vigiles facit

Mortales, solito sonat

Et pulsata Deo canit

5

Iam tunc aenea machina,

Invitatque docens bene

Letheum grave spernere,

Laudes huic modo reddere,

Qui vitam tribuit, dedit

10

Et nobis superam bene

Sanctam querere patriam;

Hic rex ecclesiam petit,

Ac laudes Domino canit.

Flambertus properans volat,

15

Quocum multa simul manus,

Vt regem perhimat bonum.

Rex horum vigil inscius

Audit dum strepitum, nichil

Formidans properat citus

20

Hoc quid visere sit; videt

Armatas militum manus.

Flambertum vocat eminus:

"Quid turbe est", ait "en bone

Vir? quid nunc populus cupit

25

Armatus referens manus?"

Respondit: "Vereare nil.

Te non ut perhimat ruit,

Sed pugnare libens cupit

Hac cum parte, tuum petit

30

Mox qui tollere spiritum".

Deceptus properat fide

Rex hac in medios simul,

Tum captus male ducitur;

A tergo hunc ferit impius

35

Romphea; cadit heu pius

Felicemque suum Deo

Commendat pie spiritum!