Ad perennis vitae fontem et amoena pascua

Praesul anxio qui corde scandere desiderat,

Talem se per omne tempus curet ut exhibeat.

Bonus pastor ad commissi ovilis custodiam

5

Mente semper circumspecta ardenter invigilat,

Pestifer ne lupus oves fauce mactet inproba.

Curis numquam perituris mentem suam occupat,

Sed satagit, gregis sui numerum ut augent,

Pro quo metuit nec mortis subire discrimina.

10

Dignis semper studiosus occupatur actibus,

Aut sacrarum paginarum lectione pascitur,

Aut cernendo mente deum ad superna ducitur.

Exit et activae vitae interdum ad spatia,

Inter cetera et carnis preparat subsidia,

15

Inquilinis et externis ne desit quod tribuat.

Ferculorum alimentis famem pellit carneam,

Mentium suavis verbi depellit inopiam,

Gemina relevans ope miserorum viscera.

Gratis, ut preceptor iussit, honorum carismata

20

Dignis tribuit, spernendo tripertita munera

Manus et obsequiorum favorisque retia.

Honus esse non honorem sacri gradus culmina

Mente cernens, perituras refugit dilitias,

Aliorum curam gerens postponendo propriam.

25

Iubar solis ut refulgens noctis fugat tenebras,

Lumine sic verbi lustrat audientum pectora

Bonus praesul et expellit vitiorum nebulas.

Karitatis, quod est deus, sic custodit lineam,

Vt potentes et egenos diligat aequaliter,

30

Et ne minimis se umquam per tumorem preferat.

Lychnos manibus retentans, id est bona opera,

Proximis monstrare studet, lumbos super ubera

Cingit etiam, quod cordis possidet munditiam.

Malos congruis terrendo corrigit affatibus,

35

Bonos ad perseverandum blandis mulcet vocibus,

Nova referens de regno, prisca de supplicio.

Non cessat precari Christum plebis pro excessibus;

In vigiliis se ipsum mactans et ieiunio

Hostia fit viva deo, monet ut apostolus.

40

Omnia fit cunctis, gaudet simul cum gaudentibus

Cum merentibus tristatur, deplorat cum flentibus,

Ceu de propriis sic dolet alienis lapsibus.

Prudens ut serpens malorum devitat astutiam,

Simplex ut columba nulli rependit malitiam,

45

Bos est tolerando mala, leo contra vitia.

Quinque vel duo suscepta talentorum pondera

Reportare redemptori satagit duplicia,

Timens ne exteriores mittatur in tenebras.

Rationis freno semper sensus regit proprios,

50

Noxia non aure capit, non cernit luminibus,

Nil olfactu, nil in gustu, nil peccat in actibus.

Sicut tuba vocis suae exaltat melodiam,

Populorum sine metu dum cohercet crimina,

Miscens asperis fomenta tristibusque mitia.

55

Talis quisque praesul iustus cum iudex advenerit,

Quantos hic sermone suo Christo adquisierit,

Praemia pro tantis regni ab ipso accipiet.

Vos itaque, magni patres, praesules egregii,

Imitari tales precor ardenter contendite

60

Et eorum per exempla sedule gradimini.

Xristi domini precepta gestate sub pectore,

Mundi vana et caduca perfecte deserite,

Crucem semper baiulantes magistrum sequimini.

Ymnis iugiter et psalmis deo laudem pangite,

65

Plebem Christi bonis semper exemplis inbuite.

Linguae numquam claustris vestrae damnentur silentii.

Zelum hostis precavete circumspecti undique,

"Possedete", dicat iudex iustus ut cum venerit,

"Praeparatum vobis regnum mundi ab origine".