Plurima cum Dominus fecisset signa per orbem,

Hanc urbem properare volens, quam nomine Nain

Hic vocitat populus, qui fit regionibus illis,

Contigit, ut veniens hunc obvia vidua haberet.

5

Hoc sacra scripta ferunt: Hec vidua, turbaque multa

Portabant feretro, fuerat qui filius illi

Vnicus, extinctum, mater merebunda secuta est.

Nescivit Dominum asstantem sibi more benigno.

Qui miserans dixit: Mulier, puerum sine flere.

10

Accedensque pius tetigit manibus pietatis

Clarius exclamans: Tibi dico, mortue, surge!

Qui surgens sedet et loquitur. Tibi gloria, Christe!

Tunc recipit genitrix genitum natumque secundo.

Accipit astantes magnus timor undique plebes

15

Magnificantque Deum dicentes: Iste propheta

Maximus in nobis surrexit miraque fecit,

Per quem nos populosque suos Deus ipse revisit.

Summe Deus, me Froumundum sub morte sepultum

Suscita preclara pietate, resuscita, Christe.

20

Non pereat, quod plantavit tua dextera, Christe.