Ave, Dunstane, praesulum

Sidus decusque splendidum,

Lux vera gentis Anglicae,

Et ad Deum dux praevie.

5

Tu spes tuorum maxima,

Dulcedo necnon intima,

Spirans odorum balsama

Vitalium melliflua.

Tibi, pater, nos credimus,

10

Quibus te nil iocundius,

Ad te manus expandimus,

Tibi preces effundimus.

Oves tuas, pastor pie,

Passim premunt angustiae,

15

Mucrone gentis barbarae

Necamur en Christicolae.

Offer sacerdos hostias

Christo precum gratissimas,

Quibus placatus criminum

20

Solvat catenas ferreas,

Per quas Anglorum terminis

Ecclesiaeque filiis

Et nationes perfidae

Pestesque cedant noxiae.

25

Per Te Pater spes unica,

Per Te Proles pax unica,

Et Spiritus Lux unica,

Adsit nobis in saecula.