Versus Eadmeri de sancto Dunstano

Salve sancta dies celebri dignissima laude,

      Qua, Dunstane pater, caelica scandis ovans!

Salve sancte dies.

Quem transitivae nactum primordia vitae

5

      Gratia caelestis imbuit, excoluit,

Salve sancta dies.

Aeger divino medicamine consolidatus

      Cum tenui virga castra maligna fugas.

Qua Dunstane ...

10

Angelico ductu templi super ardua scandens

      Vndique firmatam tendis in ecclesiam.

Salve sancta dies.

Caelorum cives audis sibi coniubilantes

      Et pacem patriae discis adesse tuae.

15

Qua Dunstane ...

Vox sonat e superis quae te de pace quietis

      Edredi regis edocet, exhilarat.

Salve sancta dies.

Daemon in effigie vulpis contritus et ursi

20

      Subdolus insidias tendit ubique tibi.

Qua Dunstane ...

Per citharae cantum praenoscis quid sit agendum,

      Vnde repente locum deseris atque habitum.

Salve sancta dies.

25

Spiritibus sanctis sociatus acumine mentis

      Kyrie eleyson eos coniubilare probas.

Qua Dunstane ...

Ad templum noctu Domini genitricis euntem

      Obvia cum sociis excipit ipsa parens.

30

Salve sancta dies.

Praecedunt binae versus modulando puellae

      Dulcis amor Christi personet ore pio.

Qua Dunstane ...

Primus ad ima ruit magna de luce superbus,

35

      Sic homo cum tumuit primus ad ima ruit.

Salve sancta dies.

Mox te spirituum sanctorum visitat ordo,

      Teque suum vocitans suadet adire Deum.

Qua Dunstane ...

40

Iam vitae metas inducit corporis aetas,

      Laetus et angelicis insereris cuneis.

Salve sancta dies.

Conduntur terris artus et spiritus astris,

      Quo tibi pro meritis gloria perpes erit.

45

Qua Dunstane ...

Iam sacer antistes Christo reverende cohaeres,

      Coniunctus superis auxiliare tuis.

Salve sancta dies.

Quod parit in nobis terreni fervor amoris

50

      Per te detergat castus amor Domini.

Qua Dunstane ...

Sic quoque unanimis ut Christo complaceamus,

      Qui nos aeterna muneret in patria.

Salve sancta dies.

55

Et faciat secum felices omne per aevum

      Vivere, quo luctus non erit aut gemitus.

Qua Dunstane ...

Quod Pater et Natus quod nobis Spiritus almus,

      Conferat ipse quod est semper ubique manens,

60

Salve sancta dies.