1

Ad caeli clara non sum dignus sidera

Leuare meos infelices oculos,

Graui depressus peccatorum pondere.

Parce, redemptor!

2

Bonum neglexi facere quod debui,

Probrosa gessi sine fine crimina,

Scelus patraui nullo clausum termino.

Subueni, Christe!

3

Cuncte, que salso maris sunt in littore,

Harenae miste purpuratis conculis

Non meis possunt coaequari uiciis,

Fateor, malis.

4

Doleo multis peccatorum iaculis

Confossus, arcu que Venus libidinis

Intorsit lita spicula mortiferi

Fellis ab unda.

5

Effudit demon de faretra flammeas

Sagittas, meum super uulnus uulnera

Inflixit statim Cupido turpissima

Fronte rugosa.

6

Factus sum uilis cuncta super uilia,

Venit latenter gladium Superbia,

Cordis infixit mucronem sub medio

Manu cruenta.

7

Genus serpentis adfuit Inuidia,

Veneni portans pocula pestiferi

Dedit in sitim, mortis auctor extitit

Sordida lues.

8

Horrida uultu faculam Discordia

Igne succensam deferens sulphureo

Medio meo posuit sub pectore,

Coxit amare.

9

Inter has quoque pennas gerens plumbeas

Inanis cursu transuolauit Gloria,

Que me uentosa nitebatur subito

Fraude perire.

10

Kanendo uenit fistula Ingluuies,

Bona presentis irrogabat temporis,

Extendit uentrem, temulentum reddidit,

Miscuit risus.

11

Lugere modo me permitte, domine,

Mala que gessi, reus ab infantia,

Lacrimas michi tua dona gratia

Cordis ab imo.

12

Meis, ut puto, uiciis tartarea

Tormenta multis non ualent sufficere,

Nisi succurrat, Christe, tua pietas

Misero michi.

13

Nullum peccatum super terrae faciem

Potest aut scelus inueniri quodpiam,

A quorum non sim inquinatus fecibus

Infelix ego.

14

Ortus, occasus, aquilo, septentrion,

Caelum terraque, mare, fontes, flumina,

Montes et colles, campi, mixta rosulis

Lilia, flete!

15

Plangite mecum, astra rutilantia,

Mecum mugite, bestiae siluicole,

Dicite: "Tu es miser, qui sub impio

Crimine gemis!"

16

Quis me de manu Cociti flammiuomi

Erui potest, nisi patris unica

Proles, qui mundum precioso sanguine

Iure redemit?

17

Redemptor mundi, unica spes omnium,

Equalis patri sanctoque spiritui,

Trinus et unus deus inuisibilis,

Michi succurre.

18

Si me subtili pensas sub libramine,

Spes in me nulla remanet fiduciae.

Sed rogo, tua me saluet potentia,

Filius dei.

19

Tolle peccatum, dilue facinora,

Ablue sordes, donoque charismatum,

Instaura meum clementer pectusculum

Munere tuo!

20

Veniam peto non meis de meritis

Fisus, sed tua certus de clementia,

Qui bona reis pietate solita

Gratis impendis.

21

Xriste, te semper recta fide labiis

Confessus, corde credidi ortodoxo,

Hereticorum dogma nefas respui

Pectore puro.

22

Ymnum fideli modulando gutture,

Arrium sperno, latrantem Sabellium,

Adsensi nunquam grunnienti Symoni

Fauce susurra.

23

Zelum pro Christi sum zelatus nomine,

Me sancta mater lacte nam catholico

Tempus per omne nutriuit ecclesia

Vbere sacro.

24

Gloria sanctae trinitatis unice

Sit deo patri, genito, paraclito,

Laus mea sonet omnia per secula

Domino semper.