Laude dulces, fluant tibiali modo:

Magnam Leodegundiam Ordonii filiam

Exultantes conlaudemus manuque adplaudamus.

Ex genere claro semine regali

5

Talis decet utique nasci proles optima

Quae paternum genus ornat maternumque sublimat

Ornata moribus, eloquiis clara,

Erudita litteris sacrisque misteriis,

Conlaudetur cantu suaui imniferis uocibus.

10

Dum facies eius rutilat decore,

Moderata regula imperat familiis

Ornat domum ac disponit mirabile ordine.

Exultet persona cui extat nexu

Coniugali tradita casta Leodegundia,

15

Placens Deo et amicis absque ulla macula.

Gaudete, gaudete, simul personate,

Cuncti eius famuli, matronae substantiam

Dulci uoce conlaudate proferentes canticum.

Vt uigeat longo feliciter aeuo,

20

Filiorum filios uideat incolumes

Gaudeatque cum amicis, exorate dominum.

Nerui repercussi manu citharistae

Tetracordon tinniat, armoniam concitet,

Vt resonent laudes dulces domne Leodegundie.

25

Dum lira reclangit, tibia resonat,

Pampilonae ciuibus melos dantes suauiter,

Recitantes in concentu laudent Leodegundiam.

Innouetur semper memoria eius,

Quae proximos diligit fideli propositu,

30

Suos optans ac externos ut pariter diligat.

Audiant propinqui, cari et amici;

Gratulantes digniter prorumpant in iubilum:

Patris decus et doctrinam proles electa tenet.

Pulcerrima nimis, audi modulamen

35

Tibiale dulciter quod electo canimus:

Deprecantes deprecamur ut famulos audias,

Vi ualeas felix et seruias Deo

Gubernesque pauperes protegasque orfanos;

Mundi quoque gratulentur te habentes dominam.

40

Lumen uerum Dei te ubique tegat:

Te tenebrae fugiant semperque resplendeas:

Obseruando legem sanctam summo Deo placeas.

Concentu parili resonate cuncti,

Cantu dulce tibia personet ut condecet:

45

Audiant et gratulentur qui te semper diligunt.

Regula canora resonat in aula

Musicalis carminis, et regalis poculus

Praeparatur ut regina potum suauem glutiat.

Ad exhilarandam faciem decoram

50

Praeparentur famuli, infundentes poculo

Ambroseum sucum braci ut laetetur affatim.

Optentur amici, ac sodales obtimi,

Conuivaeque regii resedeant pariter,

Onerentur mensae omnes ex opimis ferculis.

55

Regalis dum cibus rite praeparatur,

Signo Xristi omnia consecrata fercula;

Inquirantur more pio cuncti semper pauperes.

Dum pauper refectus cibis praeparatis

Deprecatur dominum pro salute principum,

60

Tunc redemptor aure pia inuocantes adiuuat.

Occurrant cantores suaues melos dantes;

In conspectu omnium rite consedentium

Conlaudetur nomen Dei, cuius iussu uiuimus.

Nullius scurronis hic resonent uerba,

65

Absit omne barbarum garritule scandalum,

Sed edentes ac potantes laudemus altissimum.

Incipiat cantor percutiens liram

Aut uerberans cimbalum in concentu cunctorum

Conlaudare regem Deum rectoremque omnium.

70

Illius nunc promat laudes carmen nostrum,

Cuius nutu omnibus datum extat uinculum

Caritatis coniugalis clarae Leodegundiae.

Feliciter uivas et Xristo placeas,

Placatum possideas regnum tibi traditum:

75

Nullus hostis ac aduersus contra te uictoriet.

Idonea semper sis ad obseruandam

Legem Dei melleam quae humiles indicet,

Mansuetos ac modestos ad regnum perpetuum.

Limen domus Dei mansueta mente

80

Alacrique animo frequentare piissime:

Lacrimando et orando deprecare Dominum.

Ibi dulces laudes ac praecepta uitae

Aure mentis audies quae redemtor condidit

Obseruarique praecepit his qui eum diligunt.

85

Aue, semper uale in domino Deo,

Domna Leodegundia, et post longa tempora

Regnum Xristi consequeris cum electis omnibus.