Hic fratrum numero memorantur nomina sacro,

Rite ferunt domino qui laudes et quoque grates,

Prompti servitio desudant archiministro,

Angelici proceres venerantur quem simul omnes.

5

Hoc Heriman templum cui vovit sedque locavit

Notus ubique bonis dux pollens atque triumphis.

Huic erat in voto, monachorum quo foret ordo

Hic servans regule Benedicti scripta magistri,

Sed raptus mundo complenda reliquerat almo

10

Bernhardo duci, claro virtute paterna,

Haut secus ac iussus qui cuncta peregerat actu,

Abbatem statuens Liudricum nomine dignum,

Qui regeret monachos semper pietate magistra.

Scribitur inprimis Bernhardi nobile nomen,

15

Coniugis inde pie natorum et indolis alte.

Quique locum nobis meruerunt, namque sequuntur,

Corpore quos mundus presentes denique servat.

Ast memorandorum merito post scribitur ordo.

Ipse pater primus precedit in ordine fratri

20

Dux Heriman, pariter transvexa familia celo

Et quoscunque facit socialis gratia karos.

Viventes pietate tua tu, Christe, goberna,

Defunctis veniam clemens concede benignam.