1

O Petre, petra ecclesiae

Isto beatus nomine,

Quo Petrus a Christo petra:

Non petra Christus a Petro.

2

Tu es Petrus, qui fidei

Confessor es primus: dei

Nunc primus in membris manens,

Ob quod Cephas vocatus es.

3

Adest dies, quo Romulea

In urbe consecratus es;

In quo cathedra nobili

Scandens thronum sustolleris.

4

Conlata ergo gloriae

In te potestas affluens,

Ligata solvat crimina,

Portasque Averni obstruat.

5

Hinc pastor ut piissimus

Oves gubernat creditas,

Intus forisque pervigil,

Ne subruamur, protege.

6

Et clave illa caelica

Solvens catenas criminum,

Illic reos inducito,

Quo clarus extat ianitor.

7

Vt cum polorum principi

Recisa membra iunxeris,

Sit trinitati gloria

Per cuncta semper saecula.