Iste locus mundi Silvestri membra sepulti

      Venturo domino conferet ad sonitum,

Quem dederat mundo celebrem doctissima virgo

      Atque caput mundi culmina Romulea.

5

Primum Gerbertus meruit Francigena sedem

      Remensis populi, metropolim patriae.

Inde Ravennatis meruit conscendere summum

      Aecclesiae regimen nobile fitque potens.

Post annum Romam mutato nomine sumpsit,

10

      Vt toto pastor fieret orbe novus.

Cui nimium placuit sociali mente fidelis,

      Obtulit hoc cesar tertius Otto sibi.

Tempus uterque comit clara virtute sophiae,

      Gaudet et omne seclum, frangitur omne reum.

15

Clavigeri instar erat caelorum sede potitus,

      Terna suffectus cui vice pastor erat.

Iste vicem Petri postquam suscepit, abegit

      Lustralis spatio secula morte sui.

Obriguit mundus, discussa pace triumphus

20

      Aecclesiae nutans dedidicit requiem.

Sergius hunc loculum miti pietate sacerdos

      Successorque suus compsit amore sui.

Quisquis ad hunc tumulum devexa lumina vertis,

      "Omnipotens domine", dic, "miserere sui"!