Augustine pater, clarissime doctor in orbe,

      Nullus habere potest omnia scripta tua;

Percensere valet nullus, si nocte dieque

      Incumbat libris dicta venusta legens;

5

Copia tanta fuit fandi cordisque profundum,

      Vt tibi se nullus equiparare queat.

Testamenta duo plano sermone revolvis,

      Explanans populis mistica dicta dei.

Contra hereses pugnans expugnas fortiter hostem,

10

      Catholicam retines semper in ore fidem.

Destruis errorum cultus mundique sophistas,

      Tu sacra conculcas et simulachra deum.

Es fluvius magnus ex illis, quos pater olim

      Promisit dandos adveniente deo,

15

"Aperiam", dicens, "in summis collibus undas,

      In mediis campis arida fundet aquas,

Tunc sitiens largos fontes producet habunde

      Desertum, sacros accipiet latices."

O linguam dulcem celesti rore fluentem,

20

      Os auro fulgens, splendida verba sonans!

Grates, Christe, tibi, qui talia dona dedisti

      Ecclesieque tue lumina tanta paras.

Hec ego Galcaudus ieiuno carmine prompsi,

      Te, prudens lector, obsecro, parce michi.