18.

Venerat ad quandam cellam venerabilis hospes.

Omnibus ecclesiae rebus iam rite peractis,

Fratribus et solito mandata more salute,

Omnia perspiciens sacrae sedilia cellae;

5

Ingrediens etiam sociis cellaria paucis,

In qua sola parum vini vix tunna tenebat,

Quam Christi famulus baculo benedixit honesto,

Quem manibus semper sanctus portare solebat.

Nocte sequente merum sed mox, mirabile dictu,

10

Solus in aede manens servator crescere vidit,

Donec mellifluo completa est nectare tunna.

Hoc laetus retulit venerando patri silenter,

Cui pius antistes dederat praecepta tacendi

Vsque diem mortis, nolens sibi quaerere laudem.