23. Ad nocturnum

1

Terrena cuncta iubilent,

Astra laudibus intonent;

Virginis ante thalamum

Laudes alternent dragmatum.

2

Haec uirgo uerbo grauida

Fit paradisi ianua:

Quae Deum mundo reddidit,

Caelum nobis aperuit.

3

Felix ista puerpera

Euae lege liberrima

Concepit sine coitu,

Emisit absque gemitu.

4

Diues Mariae gremium

Mundi gestauit pretium,

Quo gloriamur redimi

Soluti iugo debiti.

5

Quam patris implet filius,

Sanctus obumbrat Spiritus.

Caelum fiunt castissima

Sacrae puellae uiscera.

6

Sit tibi laus, altissime,

Qui natus es ex uirgine,

Sit honor ineffabili

Patri sanctoque flamini.