3.

Temporibus quondam tranquilla pace serenis

Caesaris Ottonis Romana sceptra tenentis,

Italiae necnon Francorum iura regentis

Hoc in honore tuo scriptum, Petre sancte, volumen

5

Auro contectum, gemmis pulcherrime comptum,

Ekbertus fieri iussit presul Trevirorum,

Magnifici fuerat qui compater imperatoris

Eius et in tota cunctis gratissimus aula,

Qui pater et patriam imperiali rexit honore,

10

Iusticiae cultor, qui pacis semper amator

Extitit et claris qui fulsit ubique triumphis.

Aurea quae perhibent, isto sub rege fuere

Saecula: sic placida populos in pace regebat,

Deterior donec paulatim ac decolor aetas

15

Et belli rabies et amor successit habendi.

Sceptriger imperium qui postquam strenue rexit,

Decessit Romae tua ad atria, Petre, sepultus,

Vivat ut aetherei susceptus in atria regni.