9.

1

Christi genealogia

Formans ceu doctrinalia

Punctum in archipatribus

Locat priscis temporibus.

2

Dehinc per ducum stemmata

Ducta Iudae prosapia

Secundus honor apicis,

Vt telon paret grammatis.

3

Sed David per imperia

Dum crevit stirps magnifica,

Quasi per sceptri gloriam

Exarat epiphaniam.

4

Tandem propago caelica

Per virginis vitalia

Dum carnem veram suscipit,

Cybi ceu formam subrigit.

A

A. En menti contemplabili

Carmen occurrit domini,

Si primos fide typice

Ftongum ponas melodiae.

B

B. Sed rudis dudum populus

Cum se subegit ducibus,

Dum affectat Mosaica,

Ceu psallit diastemata.

C

C. Sub regibus prophetica

Dum concordant preconia,

Per plura testimonia

Clara sonant sistemata.

D

D. Concentus huius carminis

Concluditur ab angelis,

Cum nato canunt domino

"Doxa en ipsistis theo."